مدمنون و لكن

طول عمرنا بنسمع عن الادمان ومخاطره, عن حالة المدمنين و صورهم. عرفنا الادمان في صورة الوحش الهادم اللي بيدمر  كل حاجة تقابله.

كل حاجة اتعلمناها و اتربينا عليها, عرفنا و شوفنا اللي المجتمع و اهلنا يعرفوه و خللونا نشوفه. حياتنا, اقتصرت معرفتنا بيها علي ضيق وجهة نظرنا و الزاوية اللي اتحددت لنا نشوف منها.

لو ركزنا في تعريف الادمان و معناه و اثاره من غير ما نربطه بسبب معين, هنلاقي الادمان ملهوش دعوة بصح و غلط, بحلال و حرام, و اثار الادمان و تبعاته زي ما هي مهما اختلف السبب.

الحقيقة, كل حاجة في حياتنا ادمان..

اختلفت خلفياتنا و عرقياتنا و توجهاتنا, لكن دنيتنا واحدة و مشاكلنا واحدة و حلولنا واحدة مع اختلاف النِسَب و المواقف اللي بنكون فيها. هروبنا واحد و طُرُقنا واحدة بنتقابل فيها في مكان ما في وقت ما.

الحقيقة, كلنا مدمنون و لكن;

بنركز دايما مع مدمنين الغلط و مدمنين الحرام, علشان اسباب كتيرة كلها ملهاش دعوة بادمانهم   ; بنتكلم عليهم, لأن سبب ادمانهم حرّمه المجتمع او الدين. بنتكلم عليهم, لأنهم بعضا من كل, و الكل ينبذ البعض لأن البعض اقليته, و ان كثر البعض و اصبح كلً, لنبذ الكل البعض الاخر حتي يكون كلً واحدا... ولن يكون ابدا.

بنتكلم عليهم لأن المجتمع و الدين في صفنا, فنتهمهم و نبعد شبهة الادمان عننا.

كلنا مدمنين و لكن;

لا نعترف, لا نواجه, لا نصارح...

اشكال كتيرة لادماننا اليومي, بس مش واخدين بالنا منها, لأنه عادي..

اللي يكون زعلان و متضايق, ينزل يشتري لبس كتير بكل فلوسه و يستلف عليهم... ادمان.

اللي يكون فرحان و عايز يبسط نفسه, يشتري حاجات كتير مش مفيدة و معظمها مش عايزها... ادمان.

اللي بيحب القهوة, لازم يشربها كل يوم و لو ماشربهاش يتضايق و يصدع و مزاجه يقلق... ادمان.

اللي بيحب الشوكولاته, لازم يكون عنده احتياطي في البيت, الثلاجة, العربية و يصحي يدور عليها... ادمان.

اللي بيشرب سجاير, لو ملقاهاش مزاجه يتعكر و يتنرفز... ادمان.

اللي مش بيشرب سجاير بس لازم ينزل كل يوم يشرب شيشة و معاه في البيت, المصيف, السفر... ادمان.

اللي عنده كل انواع و اشكال و الوان الجزم و لسه بيشتري... ادمان.

اللي بيحب يصرف فلوسه في كل و اي حاجة مفيدة او مش مفيدة... ادمان.

اللي بيحوش فلوسه و مش بيصرفها خالص مهما احتاج... ادمان.

اللي بيغير كل شوية عربية حتي لو هيقسطها و يتداين... ادمان.

اللي بيستلف علشان يشتري ساعة جديدة نزلت... ادمان.

اللي بيجيب بكل فلوسه العاب بلاي استيشن و ينفصل ايام عن العالم يلعب بيهم... ادمان.

اللي بيفضّلْ شغله علي حياته و بيته و انبساطه و اجازته و يقول انه مبسوط كدا, و هو نفسه يجي بعد كام سنة يشتكي انه ضيع عمره و كان في غفله... ادمان.

Retrieved from: http://freedom-program.com/wp-content/uploads/2015/06/%D8%A7%D8%AF%D9%85%D8%A7%D9%86-%D8%A7%D9%84%D8%A5%D9%86%D8%AA%D8%B1%D9%86%D8%AA.jpg

و زي اي مدمن ربط ادمانه بسبب يعلق عليه شماعة ادمانه, اللي بيزعل من حاجة او حاسس بنقصان في حياته; مادي, او نفسي او عاطفي, بينزل الجيم و يبات فيه و يخلليه محور حياته و يخصص له مصروف لوحده و اكل و شرب و لبس و يلغي خروجات و سفر علشانه... لأنه لقي نفسه هناك و بيطلع غضبه و طاقته, لأن محدش يعرفه هناك, لأنه بيحس انه انجز حاجة و نجح في حاجة هناك, لأنه بينسي هناك... ادمان.

اللي بيحب حد و ينام و يصحي علي صوته و كلامه و حضنه, يوحشه و هو معاه و هو بعيد, مش بيحس بمشكلة لأنه دايما جنبه بيشوفه و يلمسه, يتعب اول ما يسافر او ينشغل فمايشوفهوش, او يزعلوا مع بعض و يتخاصموا يومين, اعراض ادمانه تبان عليه في اكله و شربه و نومه و شغله و كلامه, يتحول و يتعصب و مايكونش طايق نفسه ولا حد تاني... ادمان.

اللي بيتفرج علي افلام كل يوم و يتابع كل جديد و قديم و يخلليهم عنده يعيش فيهم... ادمان.

اللي مش بيعمل حاجة غير انه يتفرج علي ماتشات و يحضر و يتابع و يفضل في بيته في مواعيدها لاغي باقي حياته و كمان لما ينزل يتكلم فيها... ادمان.

اللي مقضي حياته مذاكرة و شهادات و يذاكر تاني و تالت و لاغي باقي حياته و استمتاعه بيها... ادمان.

كلنا مدمنون و لكن...

اختلفت صور الادمان و اشكاله و لكن توحدت اسبابه و اعراضه..

كل ادمان ضار بصاحبه, حتي لو كان مفيد في سببه.

كل كثير, قليل, ان لم يكن بحد و اعتبار.

كلَ قليل كثير, طالما افاد و امتع.

كل هادر للصحة و الوقت و المال... ادمان.