لازم

اتعودنا و احنا صغيرين علي قاعدة اساسية شكّلت تربيتنا و كبرنا عليها زي اللي قبلنا, و بدون وعي بنربّي اولادنا عليها مع اننا اكتر المتضررين منها بس للأسف منعرفش غيرها.

اتعودنا دايما ان المفتاح لكل مرحلة احنا فيها اللي هيحللنا مشاكلنا هو كلمة "لازم"...

لازم تعمل حاجة علشان يحصل حاجة! 

للأسف الكلمة ديه فعلا بتجيب نتيجتها في وقتها علشان كدا بتريحنا و بتخلينا منفكرش في حاجة تانية, مع ان عمرها ما حلّيت حاجتين و عمرها ما كانت الحل الوحيد و صلاحيتها بتنتهي في مرحلة من العمر مبتنفعش فيها, بس هنعمل ايه معرفناش غيرها..

لازم تاكل عشان تكبر, طب لو ماكلتش؟. لازم تذاكر عشان تنجح, وبعد كدا نكبر و نكتشف ان النجاح مش بالمذاكرة بس. لازم تنام بدري عشان تصحي فايق, مع اني هتفاجيء بأيام هطبّق فيها ولازم افضل فايق. لازم تدخل علمي رياضة عشان تبقي مهندس و علمي علوم عشان تبقي دكتور, كدا خلاص يعني؟. لازم تجيب مجموع كذا عشان تدخل كلية كذا, يا سلام! طب لو مجبتش؟. لازم تدخل جامعة عشان تبقي محترم و تشتغل, طب اعمل ايه لو ظروفي مسمحتش؟. لازم تتخرج عشان تشتغل, دا بجد؟. لازم تشتغل عشان تعيش, تقصد انهي عيشة؟. لازم تجيب شقة عشان تتجوز, ادينا قاعدين! و لازم حاجات تانية كتير مش مهمة عشان حاجات تانية اكتر بردو مش مهمة, و ادينا بنسمع.

بتمر الايام و بتيجي المفجأة عند اخر مرة هتسمع فيها "لازم". علي فكرة الفلوس مش كل حاجة, هو بس لازم يبقي معاك فلوس عشان تعيش, شكرا عالنصيحة. طب انت بتعمل ايه؟, انا بحاول اعيش, طب و انا؟, انت ايه؟ انت محتاج فلوس عشان تعيش, و شقة, وفرش, وتوضيب, ومصاريف جواز, و شبكة, و عربية و لبس و مستلزمات و مصاريف اولاد, و لو في مصاريف اخري و شوية اقساط.. بص ماتحسبهاش احسن و هي هتمشي لوحدها وربك يسهلها من عنده.

من اول هنا و كل حاجة هتعملها بعد كدا او تفكر فيها او نفسك حتي فيها, هتلاقيلها ثمن و هيبقي الكم اهم من الكيف, مع ان طول عمرك فاهم ان القيمة اهم من السعر.. طب ليه محدش نصح بكدا قبل كدا و نبهنا من بدري؟ طب منا كان ممكن اعمل اي حاجة انقذ بيها ما يمكن انقاذه, و يبقي نص العمي احسن من العمي كله.. 

المهم في الموضوع, مفيش حاجة اسمها "لازم", ايه اللي هيحصل يعني من غيرها؟ عيش, حب, فكر, احلم, جرّب, شوف, اعمل, افشل, اتعلم, انجح و انجح و انجح, متبصش علي حد و خليك في حالك الله يخليك..

هقولك نصيحة اخيرة "لازم" تسمعها مني – "لازم تعمل كل اللي نفسك فيه عشان مش دايما هتعرف تعمله بعد كدا".

نشرت في بوابة روزاليوسف https://t.co/fdDU97oxeD

http://www.rosaelyoussef.com/news/186734/%D9%85%D8%B5%D8%B7%D9%81%D9%89-%D8%B9%D8%B2%D8%AA-%D9%8A%D9%83%D8%AA%D8%A8-%D9%84%D8%A7%D8%B2%D9%85